Jikkie Ruiter Postma FNP-SWF: Frysk, mienskip en keunst yn it hert fan Warkum
SUDWEST-FRYSLAN - Jikkie Ruiter Postma is troud mei Rob Ruiter en wennet har hiele libben al yn Warkum. Har beide jonges binne it hûs út en fiif bernsbern bringe fleur en libben yn it hûs. Nei in lange karriêre yn ferskate foarmen fan ûnderwiis, ynklusyf it spesjaal basisûnderwiis, genietsje Jikkie en Rob no fan harren pensjoen. Har frije tiid wurdt folslein brûkt foar passys lykas skilderje, bûtendoaraktiviteiten mei har hûn Famke, en it ompielen en fersoargjen fan de tún. Ek is Jikkie aktyf as frijwilliger en edukatyf meiwurker foar Warkums Erfskip en it Hylper Museum.
Warkum is foar har mear as in plak om te wenjen; it is har thús. Hjir is se opgroeid, nei skoalle west en hat se sjoen hoe’t de stêd har ûntwikkele hat. Grutsk is se op de Warkumerwaard, it moaiste plak yn Súdwest-Fryslân, dêr’t se noch altyd genietsje kin fan de romte, de stilte, de loften, sweltsjes en greidefûgels. Opgroeie yn in mienskip dêr’t men nei inoar omsjocht en dêr’t freonskip en belutsenheid normaal binne, hat har djip foarmjend beynfloede.
Jikkie waard lid fan de FNP om’t sy har dêr thús fielt en wat betsjutte kin foar de mienskip. “As FNP-er kin ik mei soarch drage foar ús moaie lânskip, ús kultuer, ús taal, it ûnderwiis en it wolwêzen fan alle ynwenners,” seit sy. Wat har it meast oansprekt yn it programma is it haadstik Wize fan libjen, mei it omtinken foar partisipaasje en in sterke, ynklusive mienskip, dêr’t elkenien in taak hat en ferantwurdlikens foar harren eigen libben kombinearre wurdt mei omtinken foar oaren. Foarsjennings moatte tichtby wêze, en kultuer is foar har in krêftich middel dat minsken byinoar bringt en de mienskip ferbynt.
Underwerpen lykas taal en kultuer, sport, de mienskip en de natoer lizze Jikkie nei oan it hert. Har winsk foar Warkum is dúdlik: minsken moatte nei elkoar omsjen, der moat in brûzjende mienskip ûntstean dêr’t men grutsk is op wat al bestiet en tagelyk sunich mei nije ûntwikkelingen omgean.
As partijlid wol Jikkie sjen, harkje en fiele wat der spilet yn de mienskip, wêr’t ferlet fan is en wêr’t help nedich is. Har boadskip foar Warkum is ienfâldich mar krêftich: alle bern moatte yn harren jonge libben yn ’e kunde komme mei keunst, kultuer en sport, sadat elkenien gelikense kânsen hat en de mienskip troch de kommende generaasjes libben bliuwt.
It folsleine ferkiezingsprogramma is te finen op de webside fan FNP Súdwest-Fryslân: www.fnp.frl/swf
